“Dees fletskes fakke mich aan de veut en as ich neet oetkiek floetsje ze mich opèns oet.” Fletskes en fakke zien biezónjere wäörd, ech neet ajerwèts. Allein waere ze nag mer zelde gebroek. Fakke beteikent det de hakke van emes oet de sjoon ómhoeëg floetsje, mèt ’t risico det de veut gans oet de sjoon sjete. Fakke is mer in ’n paar plaatse gedocumenteerd ó.a. Helden/Egchel, Sevenum en Meijel. Het waord is in ós regio waal bekènd, mer vraemp genóg sjteit ‘t hie neet vermeld in lokale waordebeuk.

Fletskes zien platte damessjoon, buigzame insjtappers die op d’n doer waal èns kènne oetloedere en daodoor get losser aan de veut kómme te zitte. D’r is ’n verbandj mèt ’t Ingelse ‘flat shoes’, wat platte sjoon beteikent. De beteikenis van flets in fletskes is ‘slap, losjes, niet stevig, niet vast’. De zeuktoch nao plaatse wao fletskes in documente truuk te vinje is levert veurluipig mer ein vergeliekbaar resultaat op, namelik in Ell. Dao waere fletskes ‘fletjes’ geneump en besjreve as platte sjoon, zónger hak. Floetsje is tamelik algemein bekènd, synonieme zien floepe en roetsje. De basisbeteikenis is ‘glijden, wegglippen’.