De beteikenis van sjraom is ‘schram, kras; streep, lijn’. Sjraom en sjräöm kómme veur taege in diverse situaties. Bie ’t hout zaege trèks se mèt behölp van ‘ne winkelhaok en ’n potloeëd ’ne sjraom (zaaglijn) op houte plenk, latte etc. As se ’n handjzaeg gebroeks is ’t de kuns óm zuver rech oppe sjraom te blieve zaege en mós se ’t zaegsel ónger de zaeg weg blieve blaoze óm de sjraom te kènne zeen. ‘ne Sjraom (schram) kèns se zèlf aan dien lief kriege ó.a. oppe erm, de bein of ’t gezich as se langs get sjpits of sjtaekeligs sjoers. Bie ’t toepe (kaartspel) kèns se ouch sjräöm (streepjes) kriege of mós se ze wegsjtrepe. Det gebeurt op ’n lei of ’n beerviltje. ‘ne Sjraom is den eigelik ’n sjtraofpunt. De kuns is óm zoe min meugelik sjräöm te verzamele en óm te zorge det de eige sjräöm weggesjtreep kènne waere. Op ’n lei kènne de sjräöm weggevaeg waere, det waert poetse geneump. Sjräöm kèns se dus letterlik verzamele bie ’t toepe mer ouch figuurlik, in de zin van geld verdene. As emes duchtig sjräöm haet den haet dae persoeën väöl geld. Bie ’t toepe is iddere sjraom ’n sjtraof en oppe bank is iddere sjraom ‘ne zaege.