In ’n krieë juupke en ’n jaok van ’n kleid nao ’t zomerfieës

Op ‘t fieës versjene Frans en Truus, lang neet mieër gezeen, väöl te vertèlle, gezèllig sjtèl. Häör versjiening waar veur get wazeltriene ’n raeje óm óngerein get te gaon sjmiespele euver de kleier die Frans en Truus aanhaje. “Kiek die dao, wat die zich höbbe aangetóddeld, ’n krieë juupke en ’n jaok van ’n kleid.” Inhoudelik gezeen neet interessant mer taalkundig waal, mèt biezónjere wäörd wie krieë, juupke en jaok. Krieë beteikent ‘krap, nauw, karig, nauwelijks voldoende’. De herkóms van ’t waord is neet dudelik, taalweitesjappers vermoede ’n relatie mèt ‘krimpen’. Juupke (neet de persoeënsnaam Juupke) is aafgeleid van ’t Franse waord ‘jupe’ det ‘vrouwenrok, onderrok’ beteikent. Opmerkelik is det juupke in ós modertaal ouch de benaming is veur ’n dun zomerjeske veur mansluuj. In allebei de beteikenisse kwaam ’t ouch veur bie ós naobere in de grenssjtreek euver de päöl. Jaok beteikent ‘juk’ in ós modertaal. Vreuger haje de luuj ’ne eige waterpöt bie ‘t hoes, wao ze water mèt ummers oet ómhoeëg takelde. Veur ’t drage van twieë ummers haje ze ’n houte jaok det oppe sjouwers achter de nek óm nao links en rechs doorleep. Op de oetinj kós ‘ne ummer ónger aan ’n touw gehäök waere. De ummers kóste zoeë same gemekkelik gedrage waere. Dameskleier, die väöl te ruum zien, veural te wied aan de sjouwers, waere ouch jaok geneump.