Tiedes de jaorlikse door PUIK-georganiseerde PUIK-borrel, veur idderein dae op ’n bepaolde meneer biedreug aan dit digitale magazine of ’n relatie hiemèt óngerhèlt, waerde aan de aanwezige verzóch óm individueel, nao eige veurkeur, drie favoriete modertaalwäörd op te sjrieve. Ónger de aanwezige ware inkele miense die ’n anger Limburgs dialek as modertaal höbbe, ouch de gaste van de gemeinte Brüggen deje mèt. Alle deilnimmers bepaolde zèlf de rangsjikking van de wäörd. Welk waord kump op de ieërste plaats, welk op de twieëde en welk op de derde? ’t Eindresultaat van de ‘enquête’ waar verrassend. In totaal deje 56 gaste mèt. De sjpelling van ’t Limburgs bleek van ’n redelik niveau te zien en alle wäörd ware dudelik laesbaar. De kènnis van de waordesjat zit bie de aanwezige generatie, vanaaf zèk mer 20 toet 75 jaor, nag good op niveau, ouch al sjreef neet idderein nag ’n derde waord op. In ’t volgende euverzich kènne de deilnimmers en de PUIK-laezers zeen wat de enquête concreet haet opgeleverd.