Zich begaje haet diverse beteikenisse. Ein van de beteikenisse is ‘plezier beleven, lol maken’. De kinjer höbbe zich begaajd mèt ’t ploense in ’t water. Miense kènne zich zoedanig amusere det ze zich begaje van de lach. ’n Angere beteikenis is ‘zich flink tegoed doen aan eten en drinken’. Nao de wedsjtried kwaam idderein nao de kantine wao ze zich begaajde aan de good gevulde kumpkes chips, neutjes, zaatsjtengels en daonao aan de sjaole mèt borrelhepkes. Óngertösse drónke ze zich d’r eine, of ‘n paar mier, op de euverwinning en wie ze op hoes aan ginge haje sommige ‘m good gelaje. Wat haje ze den good gelaje? De boek natuurlik. Idderein dae zich good begaajd haaj waar gelökkig en tevreje. D’r zien ouch situaties waobie zich begaje get negatievere resultate oplevert wie bieveurbeeld ‘zich vuil maken’ en ‘vechten, slaags raken’. Door ’t sjpele in de toter langs de baek höbbe de kinjer zich tamelik begaajd. Erger waert ’t as ’n situatie oetlöp op vechte. Ónger ’t voetballe op ’t veldje krege ze get sjtraevelerie mèt as gevolg det ze zich daonao óngerein duchtig begaajd höbbe.