In ’t dageliks taalgebroek waert de originele modertaal-vocabulaire ál klènder, veural ónger de jóngere generatie. Vocabulaire beteikent de complete verzameling van alle wäörd die emes kènt, de eige waordesjat dus. Versjet is ’n waord det ál minder gebroek waert en vervange waert door vork, en ‘n versjetje is noe ‘n vörkske gewaore. Versjet is aafgeleid van ’t Franse waord fourchette. Väöl Franse wäörd zien opgenaome in ós modertaal. Tösse 1700 en 1900 woort in elitaire kringe väöl Frans gekald. In ’t Nederlands en ’t Limburgs zien väöl Franse wäörd opgenaome. De gewuuëne Limburgse luuj nome ouch diverse Franse wäörd euver, mer sjproke die waal op ’n eige meneer oet. Zie haje namelik noeëts Frans gelierd. Veurbeelde zien: sjelderm > gendarme (agent), garesjas > garde-chasse (jachtopziener), kraasj > courage (moed), breer > barrière (slagboom), kernalie > canaille (feeks), plefóng > plafond, kallebas > cabas (boodschappen-/handtas), sergeant > serre-joint (grote lijmklem), odeklónj > eau de cologne, koekdenan > couque de Dinant, kersjet > corset.