Dit is ‘n opmerking die gemaak waert taege emes dae rare fratse oethaolt of zich erg aansjtèllerig en euverdreve gedreug. Sintermerte is ’n gewaardeerd historisch figuur en euver zoe emes waert mèt respect gekald. As miense raar gedraag ervare waert det vergeleke mèt ’t make van ’n karikatuur van Sintermerte. Door die vergelieking te make zal de aangesjpraoke persoeën haopelik begriepe wie ’n bepaold gedraag bie angere euverkump. Mèt anger wäörd ‘doot mer normaal’. Ós modertaal is riek aan oetdrökkinge en Sinterklaos kump dao ouch in veur. “Wat bös doe mich toch ‘ne Sinterklaos!” Det is gèn cómpliment mer beteikent eigelik hampeleman. Hie waert dus ouch van Sinterklaos ‘n karikatuur gemaak, die waal geaccepteerd is. “Die weite allebei waal waem Sinterklaos is.” Det zien den twieë sjlummerike die det weite. ”Doe gluifs nag in Sinterklaos.” Dit waert gezag taege ‘ne volwassene dae erg goodgeluivig is. Wat d’r ouch gezag waert, Sintermerte en Sinterklaos gaon nag altied handj in handj en zorge det veur blieve geluive in ’t goeje.