Óm te kènne sjrieve höbs se pen en pepier nuuëdig. Mer de aan miense gekoppelde activiteit van sjrieve waert in de volksmóndj ouch gebroek as ómsjrieving in angere situaties. Bieveurbeeld in de waereld van ónger angere insecte en veugel. Zoeë neume veur ’n bepaolde kleine watertor ’n sjrieverke. Dit törke kèn tamelik rap cirkelend op ’t wateroppervlak róndjzjwumme en bie ónraod deep wegduike. Det róndjcirkele neume veur kringele en mèt get fantasie is det zoegezag sjrieve op ’t water. De ‘geelgors’ is ’n prachtig veugelke, det veur sjriever neume. Dit veugelke dank ziene naam aan ’t biezónjere uterlik van de eikes in ziene bóch. Op die eikes zeen veur grèllige lienkes, vertakde kriedzelkes, asof emes begós waar aan ’t teikene van tekskes en gèn zin mieër haaj óm d’r blaedjes aan te make. Dit biezónjere uterlik van de eikes waert dus aan det veugelke toegesjreve. Mer deze sjriever kèn gaar neet sjrieve of teikene, waal fluitend biezónjere eikes lègke.

De vraog nao de achtergróndj van sjriever kump van Anja van Willick oet de Ruiver.