De hèts is in deze tied van klimaatverangering ’n greujend probleem aan ’t waere. Zjweite van de hèts is van alle tieje en d’r zien diverse oetdrökkinge in ós modertaal die mèt zjweite te make höbbe zónger det d’r hèts aan te pas hoof te kómme. Zjweit is in ’t Limburgs mannelik, dus ‘de zjweit’. In ’t Nederlands is ‘zweet’ onzijdig: het zweet. ‘Luie zjweit is gauw gereid’ waert gezag as emes nao ’n korte insjpanning mènt genóg te höbbe gedaon. ‘Dae ruuk ziene eige zjweit neet gaer’. Zoeë emes is gewuuën lui.

‘Hae vrit det d’r zjweit en hae wèrk det d’r kaad waerd’. Det beteikent det emes veuraan sjteit óm óngegeneerd aete nao binne te wèrke en de lètste is óm de henj oet de moewe te sjtaeke. ‘Ich zjweitde water en blood’ De oetdrökking ‘water en blood zjweite’ waert gebroek as besjrieving van heftige emoties wie ings, paniek, acute probleme. Oetdrökkinge die ’n bepaolde intensiteit van ’t zjweite aangaeve zien: ‘Zie haje de zjweit diek oppe rök sjtaon’ / ‘De zjweit leep mich inne bóks’/ ‘De zjweit ziepde mich langs ‘t gezich’.