De Limburgse Vastelaovend en de nonnevotte gaon handj in handj. De nonnevot is ’n traditioneel gebak van de ambachtelike bekkers in Limburg. Nonnevotte waere tösse de 11e van de 11e en Aswoensdig gebakke en gegaete. Wao kump dees traditie vanaaf? Nonnevotte waerde al róndj 1600 gebakke en toen haje ze al vergeliekbare name. Wat de beteikenis betref is d’r ’n relatie mèt ’t Franse ‘le pet-de-nonne’ det ‘nonnenscheet’ beteikent en gebroek waert as benaming veur ‘ne rónje Franse beignet. In Rienlandse dialecte zien ouch de gebaksbenaminge Nonnenfürzchen en Nonnenvots bekènd. In ’t Nederlands zien vergeliekbare name wie nonnenscheet en nonnenforts besjreve. Vort is ‘n aad Nederlands waord veur ‘buikwind, scheet, veest’. Votte en sjeetjes zien al sinds mienseheugenis pikante óngerwerpe óm gekke jen euver te make. De vraog waoróm veur de naam nonnevot gekaoze is, levert gèn dudelik bewiesbare verklaoring op. Feit is waal det de nonne de naam ech neet zèlf bedach höbbe. Waarsjienlik is dae hiel lang geleje örges in ‘ne kolderieke sfeer óntsjtange en haet zich wied versjpreid. Mieër weite euver Limburgse nonnevotte, de historie, welke Limburgse bekkers nonnevotte bakke, nonnevotterecepte? Kiek èns op https://nonnevotten.nl/. Ech de meujte waerd, compleet mèt Radio Nonnevot, video’s en nonnevottekleurplate veur kinjer.

’t Waord nonnevot is as biezónjer dialectwaord nao veure gebrach in de dialectpodcast van PUIK-dialect door ózze börgemeister Martijn Derks.