Mèt greke maaks se gèn vrunj, intaegedeil. De sjtumming waert d’r neet baeter op. Zoe waar de sjtumming tösse de Romeine en de Grieke erg wisselend, toet oorloge toe. De Romeine haje bewónjering veur de kennis en de cultuur van de Grieke mer euver de Griekse volksaard van toen haje ze zoeë häör eige opvattinge. De Romeine höbbe de naam Grieke bedach veur ‘ne (Griekse) bevolkinggroep in Zuud-Italië. Later woort dae naam algemein gebroek. De Grieke neume zichzèlf neet zoeë (Hellas- Hellenen). De Latiense naam is ‘graecus’ en de vorm ‘graeculus’ is neet bepaold positief. De Romeine vónje de Grieke moelemaekers, lichzinnig en mèt ‘n ruig laeve. Negatieve typeringe bleve lang aan ’t waord Griek plekke. In diverse Limburgse dialecte, ouch in ós eige lokale modertaal, is ‘greek’ emes mèt ’n ónhöbbelik nors gedraag en dao is greke en greekbaer van aafgeleid. De greekbaer waert ouch waal knoterzak of grauwelaer geneump. De meiste kans óm grekers en näölers te vinje, is in Vènlo. Ze zègke det ’t dao in de volksaard zit en det zoes se neet zègke van ’t sjtedje van lol en plezeer. Ludiek is ’t initiatief van ‘t Venlose ‘tekenaarscollectief Usake Wok’ óm ‘ne reusachtige witte Greekbaer ‘n jaor lang op ‘n rotonde aan de Maaskade te plaatse. Usake Wok is ’n anagram (letterverplaatsing) van ‘koekwaus’. Mer die drie koekwauze zien zoe gek nag neet. En de Greekbaer? Dae mót Venlo veurluipig amusere mèt ‘ne sjeurkalender.