“Kiek èns dao wie ze d’rop sjteit”. Mèt dees opmerking kèn get positiefs óf get negatiefs bedoeld zien. Dudeliker is ’t as ’n preciezere besjrieving gebroek waert. “Veur häöre laeftied sjteit ze d’r nag patent op”. Det beteikent det die vrouw d’r netjes gekleid en verzorg oetzuut. “Hae sjteit d’r sjebbetig op.” Dit beteikent ’t taegedeil, in dit geval ’ne man mèt ‘n ónverzorg uterlik. Miense kènne d’r dus good of sjlech opsjtaon. Neet allein lètterlik mer ouch figuurlik, “Zie sjtaon d’r bie idderein good op.” Det beteikent ‘ne hoeëge dunk van de persoeëne in kwestie höbbe. Ouch zake kènne d’r figuurlik good of sjlech opsjtaon. “Die zaak sjteit d’r nag altied good op”. Det beteikent det de zaak in kwestie aantrèkkelik is gebleve en good sjteit aangesjreve. En wie sjteit ós modertaal d’r eigelik op? Trendy mèt hippe outfit, good gevulde kleierkas mèt strings, slips, singlets, t-shirts, leggings, jeans, chino’s, blazers, twinset, jumpsuit, bodywarmer, casual polo’s, all weather jacket, boots, pumps en sneakers. Allemaol casual modertaal.