Verroepzake beteikent roew ómsjpringe mèt allerlei zake, ónger angere alles wat riejt en neet óngerhaje en gans verwaarloos is. Muibels, gereidsjap, materiaal, kleier enz. kènne ouch verroepzak waere. ’n Anger waord is versjanjelere det óngevieër dezèlfde beteikenis haet, Allein haet det mieër te make mèt get verkieërd doon. “Ich höb die deur versjanjeleerd door de verkieërde verf te gebroeke.” Sommige versjanjeleringe zien gelökkig nag waal te hersjtelle. ‘n Gräödje erger is verrannewere, want den kèn alles in de sjrotcontainer bie ’t graof aafval of bie ’t aad iezer. ’t Waord verroepzakke deile veur mèt de vreugere Rienlandse dialecte, dao waar ’t verrupsacken, krek ‘tzèlfde dus. Roepzak neume veur emes dae roew mèt allerlei grei ómgeit. As emes gejaag en neet al te netjes wèrk, waert gezag; “Hae begós d’raan en roep, roep waar ’t klaor.” Zó’n type neume veur ‘ne roepetige.