“Det kèns se baeter neet doon. Ich raoj ’t dich aaf want dao kries se gegarandeerd knómmelerie mèt.” De beteikenis van knómmel is waal bekènd, namelik ‘een prul, een ding van geringe waarde’. Vreuger waar ’n kinjerhandj al gauw gevöld mèt ’n knummelke van de kermis of van de fóddelekrieëmer. Kinjer ware hersjtikke blie mèt zó’n knummelke. Get knómmele kènne en doon väöl luuj ouch waal. In det geval is de beteikenis ‘knutselen, hobbymatig met klusjes bezig zijn’. Väöl handjwèrk mèt allerlei klusgerei dus, ouch in de haof of in ’n hobbykeske kèn geknómmeld waere. Aanknómmele en aankloeëte höbbe ’n negatieve beteikenis, namelik ‘aanmodderen, aanprutsen’. Den is emes tamelik ónhenjig bezig en ’t resultaat waert knómmelig geneump. “Hae haet die sjötting knómmelig neergezat.” De oetdrökking ‘knómmelerie kriege’ is ’n typische oetdrökking oet ós lokale modertaal. De achterligkende beteikenis is det emes in ’n vervaelende positie of in óngunstige ómsjtenj terech kèn kómme. Synonieme zien ónger angere gedeuns en trammelant.