“Kiek oet bie die sjteigers, ich höb dao miene daets al duchtig aan gesjtoeëte“ In ós lokale modertaal geuf ’t diverse oetdrökkinge veur de kop van ‘ne miens. Bieveurbeeld: daets, bölles, höd, sjter, köls, bums, kiebes. De kop van ‘ne miens is kosbaar én kwetsbaar. Ál mier waert de naodrök op besjerming van de kop gelag. Nao de militaire helme kwame de motor- en brómfietshelme, de wèrkhelme, de sjporthelme en noe zien de fietshelme in opkóms. De ieërste brómfiets- en motorhelme zoge d’roet wie ’n pötje of ‘ne kómp, mèt ‘ne reem d’raan. Die helme woorte sjpottend pötjes geneump. En ’n róndj geknip kapsel hoot pötjeskapsel, kómp oppe kop en knippe mer. Noe is zó’n kapsel veural in de gróttere sjtaej weer populair en dreug de Ingelse naam ‘bowl cut’. Beteikent ‘tzèlfde as pötjeskapsel mer huurt zich waal väöl sjieker aan én mèt de moderne bowl cut löps se neet mier veur sjöt. De pötjeshelm is allein nag mer te bewónjere as leefhöbbers van historische brómmers achterein op häör prónksjtökke door ós Limburgs lendje toere.