“Veur verkoupe de hut en gaon klènder woeëne.” De hut is ’n get ruige benaming veur ’n woeënhoes. Vergeliekbaar is ’t waord koeëj. Hoes is nag altied de klassieke benaming. ’t Mieërvoud van hoes in ós lokale modertaal is huzer of hoezer. Ós gemeinte is ’n euvergangsgebied wao ’t oet de regio Venlo sjtammende ‘huzer’ (of huus) naeve ’t in de regio Remunj gangbare ‘hoezer’ gebroek waert. Veur groeëte huzer geuf ’t in ós modertaal de benaminge klip en tempel. ”Die aaj knal höbbe ze prachtig opgeknap.” Knal is de benaming veur ’n hoes wao noeëts get aan gerenoveerd is. In ’t Nederlands geuf ’t de benaminge knal en klip veur ’n woeënhoes neet. Wie ’t gebroek van knal of klip in ós modertaal óntsjtange is blief ’n raodsel. Klip is waarsjienlik ‘n symbolische vergelieking mèt ‘ne groeëte rots in de zieë. Nao de Twieëde Waereldoorlog goof ‘t in ós gemeinte witte noeëdwuuëninge van het Ingelse fabricaat ‘Maycrete’. Det waar ’n compleet bouwpakket mèt veurgefabriceerde betonplate en kantj en klaor houtwèrk, prefabwuuëninge geneump. Naeve prefabwuuëning geuf ’t niejere begrippe wie woeënunit, flexwuuëning, containerwuuëning en tiny house. Tiny house beteikent ‘klein huis’ in ’t Nederlands. Veur ’t begrip tiny house is nog gèn passend, algemein gebroek alternatief in ’t Nederlands of ós modertaal aanwezig. Dus blief ‘t ’n gelinde benaming oet ’t Ingels.