Idderein waert waal èns geconfronteerd mèt ’n roeps of ’n maaj. Wao kómme die eigelik vanaaf? Roepse óntsjtaon oet eikes die op plante of plantereste gelag waere door vlinders. Oet die eikes kómme roepse die van de plante aete. Hiel biezónjer is de Bezels-Ruiverse benaming veur vlinders, namelik roepsesjieters. Roepsesjieter is totaal oet de actief gebroekde waordesjat verdwene. Vlinders sjiete eigelik gèn roepse mer lègke eikes. Roeps is ’n fase in de ómvorming van eike toet vlinder. Roepsesjieter is ‘ne neet erg aangenaam klinkende naam veur ’n prachtige versjiening in de natuur óm ós haer. Die benaming geuf ’t ouch in Vlodrop, Montfort, Posterholt, Panningen en Maasbree. Weer ‘n angere categorie zien de majesjieters. Majesjieter is ’n benaming veur ’n dieke vleeg. Die vlege sjiete eigelik gèn maje mer lègke eikes, krek wie roepsesjieters. Oet die eikes kómme den maje en die verangere weer in vlege. Majesjieters, ouch waal brómvlege of vleisvlege geneump, kómme gaer op aeteswaar aaf, veural vleis. Ze zien óngenuuëjde irritante gaste bie barbecues en op terrasse. De benaming majesjieter kump in väöl Limburgse plaatse veur.