“Kèns doe mich morge de waar gaon haole? Ich höb hie ’n breefke mèt alles wat ich nuuëdig höb.” De waar haole is ‘n zeldzame oetdrökking gewaore. Zie kump oet de tied det d’r veural in de dörpe winkels in koloniale waar geäöpend woorte. Oppe Ruiver gebeurde det aan de Riekswaeg in 1891door Cornelis Teunissen, zoon van Leonard Teunissen (Hoeve de Schei in Lieëwe). Same mèt zien vrouw Theodora (Zaayen) bouwde Cornelis de zaak op en ’t assortiment greujde in de loup der jaore flink. Zie adverteerde dök mèt sjpeciale producte in de regionale gezette, same mèt angere winkels oet diverse plaatse. Later nome zoon Hubertus (Teunissen Baer) en zien vrouw Elisa (Smits) de zaak euver en zie breide de zaak wiejer oet mèt ‘n ‘Electrische Koek- en Beschuitbakkerij’ wao ónger angere de bekènde paeperkook mèt de merknaam ‘Erica’ gebakke woort. Weer ’n generatie wiejer nome Jan en Dré, twieë zeuns van Baer en Elisa, de zaak euver en zie ware de gróndjlègkers van de ieërste Ruiverse supermert ‘TS-SUPERMARKT’. (Teunissen-Smits).