“Det is ‘n paersnaef van ós oet Naer en die anger twieë zien paersnichte oet Baolder.” Paersnaef en paersnich zien benaminge veur emes dae wied femilie is. Die typeringe zien komisch bedoeld en daomèt gaeve miense aan det emes waal in de femilie bekènd is mer zelde in beeld kump. In ’t Nederlands kómme ‘paardenneef’ en ‘paardennicht’ neet veur. De relatie mèt de naam paerd is neet dudelik, missjien figuurlik gebroek as ‘emes oet ’ne gróttere groep’ (paerd). Normaal gesjpraoke waert gezag “Det is nag wied femilie van ós.” En as óngerein euver die wieje femilie gekald woort den gebroekde de ajere femilieleje dökker de oetdrökking ‘de klump toese’. Bieveurbeeld: “Mèt die van Naers Maan höbbe die van ós nag de klump getoes.” Toese beteikent ‘ruilen’ en dit waord waar ’n gans normaal dageliks gebroek waord. In de aafgeloupe zèstig jaor is dit waord totaal oet ós modertaal verdwene en vervange door ruile. Waem wilt ruile noe nag toese?