“Wie ich oet ’t zjwumbad kwam kreeg ich de miemkesrazel van de kaaj.” Miemkesrazel is  ’n samegesjtèld waord van miemkes en razel. De beteikenis is gebaseerd op ’t razele van miemkes. Razele beteikent ‘rillen, bibberen’ en ’n miemke is ‘een jong katje’. Waem waal èns ’n miemke haet vasgehad wèt wie zó’n razelend miemke zich aanveult. De naam miemke of mieske veur ’n pasgebaore ketje gèlt zoewaal veur ‘ne kater as veur ’n poes. De volwasse poes waert miem of mies geneump. “Ós miem haet drie jónge. Wils se ’s ein?” Miem en mies zien wäörd die in ’t dagelikse modertaalgebroek nag mer zelde veurkómme en zien verdrónge door poes. Mer de meis gebroekde algemeine naam is kat, de benaming veur ’n poes én ‘ne kater. En ’n jónk poesje en ‘ne jónge kater waere daoróm allebei ketje geneump. ‘n Bekènd sjpraekwáörd euver de kater en de mies is: ‘Met Sinte Maties geit de kater nao de mies’. Daomèt waert de tied róndj Sint Maties (Matthias, 24 februari) bedoeld as de katers luips waere. Miemke is ouch waal èns van toepassing op persoeëne. “Het is ’n ech miemke gewaore.” In dit verbandj beteikent miemke ‘een afstandelijk, schuchter en bedeesd persoon’. ’t Taegegesjtèlde vinje veur truuk in de oetdrökking “Det is ‘ne richtige katerskop.” Det beteikent ‘een vinnig, bits en onplezierig persoon’. Miemkes razele nag altied mer of miense nag zègke det ze de miemkesrazel kriege is de vraog.