“Gluifs se in de paoshaas of in de paosklokke? Volges de katholieke traditie bringe de paosklokke die truukkómme oet Roeëme (Rome) in de nach van paoszaoterdig op paoszóndig paoseier mèt en sjödde die den hie en dao neer. Die klokke zien nao ’t Gloria in de Mès op Witte Dónderdig nao Roeëme gevlaoge óm dao paoseier op te haole. Op Goeje Vriedig en paoszaoterdig moogde nörges de kèrklokke geloed waere. Ouch de mèsdeners moogde den in de Mès, tiedes de consecratie, neet mèt de alterbelkes rinkele. In plaats daovan gebroekde ze houte klippekleppers, wao ze mèt klepperde. Mèt die kleppers trokke ze in de ‘kèrklokvrieje’ daag langs alle hoezer en klepperde duchtig bie alle veurdeure toetdet de deure aopeginge. Ze krege den eier, sjlók of geld. Nao aafloup waerde de eier en ’t sjlók ónger alle mèsdeners verdeild. ’t Geld ging in de pot veur ’t jaorlikse reisje. ’t Verhaol van de paoshaas kump oet protestantse kringe, bedoeld as taegehenger van de paosklokke. Allebei de verhaole zien aafgeleid van ajere ‘heidense’ lentefieëste, waobie eier ’n symbool ware veur vruchbaarheid en nie laeve bie ’t begin van de lente. Bekènd is ’t Ostarafieës ter iere van de Germaanse godin Ostara. De naamgaeving is nag truuk te vinje in ’t Duitse waord Ostern (Pasen) en ’t Ingelse Easter (Pasen). Taegewaordig is de paoshaas mèt de paoseier ’n algemein verhaol gewaore, los van religies en veurchristelike lentefieëste.