Toen de binnegrenze in Europa nag neet aope ware, waerde de landjsgrenze permanent bewaak en alle grensverkieër gecontroleerd. Det waar veural ‘n taak veur de douanebeambte, kemieze geneump. ’t Waord ‘kemies’ is aafgeleid van ’t Franse waord ‘commis’ det ambtenaar of klerk beteikent, bedoeld veur diverse functies. In ós modertaal waerde kemies neet veur alle functies gebroek mer allein veur ’ne ambtenaar mèt ’n sjpeciale taak, namelik grenscontroles. Ambtenare aan de angere kantj van de päöl mèt dezèlfde taak waerde dao ouch ‘kamis’ of ‘komis’ geneump. De kemieze haje de opdrach óm grenscontroles oet te veure op goedere die miense bie zich haje, inveurrechte te handjhave en sjmoekele te veurkómme. Bie de klèndere grensposte en grenseuvergeng veurde ze ouch bewakingstake oet. In ós eige grenssjtreek waerde hiel väöl gesjmoekeld. Miense aan ózze kantj van de grens sjmoekelde van alles de grens euver en ómgekieërd deje miense oet Pruses ‘tzèlfde. Individueel of georganiseerd in sjmoekelgruupkes. Det waar ’n richtig kat en moessjpel mèt de kemieze. Toen in 1995 de binnegrenze officieel aope ginge en idderein zónger controles de grens euver kós, verdwene de kemieze oet beeld en daomèt vervaagde ouch ’t begrip ‘kemies’.

De vraog nao de herkóms van kemies kump van Henny Theeuwen oet Óffebek.