“Waar uch veur de kaorepater! Gaot neet in ’t kaore!” De kaorepater is ‘ne variant op de mythologische figuur van de ‘korengeest’, besjermer van de vruchtbaarheid van ’t veld en bewaker van ’t kaore. Bie ós bure euver de päöl geuf ‘t ‘ne vrouwelike variant, ’n heksefiguur mèt de naam ‘Kornmutter’ en ‘Kornmön’. Verhaole euver de kaorepater zien verzónne óm kinjer duchtig sjrik aan te jage zoedet ze neet in ’t kaore ginge sjpele. Väöl kaore waerde verneeld door sjpelende kinjer en de boere haje d’r sjaaj door. De kaorepater waerde taegeneuver de kinjer ómsjreve as ’n saort vampier. Det veur ‘n paterfiguur as symbool van aafsjrikking is gekaoze haet waarsjienlik te make mèt de oetsjraoling van sjtrengheid en gezag. ’t Begrip kaorepater haet ouch nag ’n angere beteikenis gekrege, namelik as bienaam veur ‘ne baedelmonnik ouch waal baedelpater geneump. Die kaorepaters huurde bie ’n bepaolde kloeësterorde, gebaseerd op de gelofte van ermood. Zie laefde hiel sober en ware aafhankelik van leefdadigheid. Daoróm trokke ze róndj óm te baedele, dök vraoge ze ouch óm ’ne zak kaore. Dees beteikenis kump ó.a. veur in Baolder (Baarlo), Bree (Maasbree), Vlorp (Vlodrop), Hael (Heel), Zjwame (Swalmen). In Vènlo is ‘ne kaorepater ‘een merkwaardig persoon’ en gèn sjpoeëk of baedelaer.

De vraog nao de achtergróndj van kaorepater kump van Jos Cremers oet Belvend (Belfeld).