Mèt Vastelaovend in gedachte kómme de volgende nostalgische attribute oet ós modertaal nao veure: feepkes, träötjes, indianebielkes, cowboyrevolvers, pesjtungskes. Det pesjtungskes has oet ós collectieve geheuge verdwene zien, en dus ouch oet ós actief taalgebroek, kump door de nieje tied mèt verangerende opvattinge en invloede. Welk kindj moog nag mèt Vastelaovend mèt ’ne mèt pesjtungskes gelaje sjpeelgoodrevolver of ’n rubbere indianebielke róndjloupe en veur cowboy of indiaan sjpele? Is ’t risico det ze daodoor echte vechtersbaze waere wörkelik zoe groeët? Den loupe d’r hiel get gevieërlike luuj mèt ’n cowboy- of indianeverleje oet häöre vastelaovesjeug róndj. De invloed van actiegroepe sjpeelt ’n nag gróttere rol. Is emes mèt ‘n cowboy- , indiane- of chinezepekske neet ‘n symbool van discriminatie en racisme? Winkels die ze nag verkoupe sjtaon ónger drök. Vastelaovend sjteit in ’t vizier, lik ónger ’n vergroeëtglaas, miense waere veurzichtig. As veur truukkieke in de gesjiedenis zoot de Vastelaovend lange tied in ’t verdomheukske. In diverse plaatse waerde carnaval as ‘heidens feest met liederlijke liedjes en onzedige danspartijen’ verbaoje. Noe worstele organisaties mèt ’t make van ’n beleid det gènne trammelant oplevert. Wat kèn waal nag en wat kèn neet mieër door de beugel? Sjoldaot, pater, non, boer, boerin, duvel, bissjop, ingel, hippy, baedelaer, man as vrouw verkleid, vrouw as man verkleid? En getinte maskes, welke kleur moog waal en welke neet? Kump d’r ’n Vastelaoveskeurmerk?