Crème craque is in ós lokale modertaal baeter bekènd as ‘hemelse módder’. Vreuger waerde hemelse módder allein mer as biezónjer toetje tiedes de fieësdaag gemaak, veural mèt Körsmes. Op det hemelse toetje sjpitsde idderein zich. De term craque of caraque haet te make met de herkóms van de cacao waovan bepaolde sjeklaad (chocolade) waert gemaak. Ein van de bèste cacaosaorte, gemaak van de Criollo-cacaoboeëne, kump oet Venezuela in de regio róndj Caracas, door de Franse vreuger Caraque geneump. Zoeë gove sjeklaadfabrikante bepaolde sjeklaadjes de naam ‘caraques’ as bewies veur de topkwaliteit van ’t gebroekde cacaomingsel. Waereldberoemd ware de sjeklaadjes in de trómmels van Droste mèt de naam ‘Crême de Caraque’ (chocolate bonbons from Holland). In Limburg ginge de luuj in bepaolde regio’s de eigesgemaakde sjeklade mousse, de hemelse módder, crème craque neume. ’t Bekènde toetje kreeg daomèt in sommige plaatse ‘ne angere beroemde naam. ’t Is ’n benaming die in bepaolde Limburgse femilies binne ós gemeinsjap nag altied gangbaar is. Emes oet de ajere generatie van die femilies haet waarsjienlik de benaming crème craque oet angere Limburgse regio’s mètgebrach.

De vraog nao de herkóms van crème craque kump van Ellen Bongaerts-Janssen oet Bezel (van de femilie Janssen-Rutten oet de Ruiver).