Sjieëpers höbbe euver de ganse waereld gesjiedenis gesjreve en ze sjpele same mèt häör sjäöp nag altied ’n prominente rol in ’t körsverhaol. Generatie nao generatie is opgegreujd mèt ’t bekènde körsleedje “De herdertjes lagen bij nachte.” Aad, hiel aad is ’t beroep van sjieëper en aad is ouch zien naamgaeving. De Germane gebroekde róndj 100 veur Christus al ’t waord *skapahirdi. In de loup van de gesjiedenis haet zich det waord óntwikkeld toet ‘shepherd’ (Ingels) , ‘Schafhirte’(Duits), ‘schaapherder’ (Nederlands). In diverse dialectgebiede in ós landj waere de wäörd ‘schaper, scheper en sjieëper’ gebroek. In de vreuge veurluipers van ’t Limburgs( ± 1200) sjproke de luuj van ‘n ‘scheperie, sjieëperie’ en daomèt bedoelde ze ’n boerderie wao sjäöp gefok waerde. Al vreug in de gesjiedenis van ós gemeinte trokke sjieëpers mèt häör kuddes euver de Rovershei. Róndj 1875 wónde de sjieëper van Bergerhaof, Antonius Sanders en zien vrouw Anna in ’n huuske oppe Benheuvel in Óffebek (Industriesjtraot). Det huuske kreeg de naam ‘sjieëpershuuske’. Later wónde dao de femilie Rovers en toen waerde ’t huuske ‘Rovershoes’ geneump.