’n  Bóks van ribfluwieël neume veur in ós modertaal ’n mesjester(se) bóks of ribbóks. De sjtóf veur de mesjesterse bóks is óntwikkeld in de Ingelse sjtad Manchester in de 19^eieëw. In ós modertaal is de Ingelse oetsjpraok van Manchester get aafgevlak toet mesjester. De ribfluwieële bókse ware hiel lang populair as wèrkbóks, degelik en soepel. De angere benaming veur ribfluwieël is corduroy. Det sjient de veurluiper van mesjester sjtóf oet de 18^eieëw te zien gewaes, ’n saort graove wolle sjtóf. Róndj 1970 is de naam corduroy hergebroek óm de marketing róndj ribfluwieële kleiing in ’n nie jeske te sjtaeke. Corduroy sjprook toet de verbeelding en maakde ribfluwieël weer erg populair. Daonaeve bleef de benaming Manchester toch nag besjtaon. Mesjester (Manchester) as naam veur ribfluwieël neume veur ’n geoniem. Det is ’n waord det is aafgeleid van ‘ne aardrikskundige naam en verwies nao ’ne biezónjere relatie mèt dae naam. Sjwaed in sjwaed(e) sjoon is ouch ’n geoniem, det geworteld is in de Franse benaming ‘gants de Suede’ globaal vertaald as ‘handschoenen uit Zweden’ Det ware soepele hase van renderelaer en hertelaer, mèt ’n wolle binnevulling. Sjwaed (suède) is laer van de zaachte, geborstelde binnekantj van ’n bieëstevel, taegewaordig ouch van rinjer, sjäöp en geite. Dao waere sjoon, bókse, rök, jes, tasse, hase, reme etc. van gemaak. Mesjester en sjwaed gaon prima same.