Sinterklaos, de heilige Sint-Nicolaas, bissjop van Myra, haet ech besjtange, gènne twiefel meugelik. De katholieke höbbe róndj Sinterklaos as goodheiligman ’n volksverhaol en ’n fieësritueel óntwikkeld, wao-in veural de verbeelding ’n groeëte rol sjpeelt, sjpeciaal bedoeld veur kinjer. Resultaat? Sinterklaos is de populairste heilige bissjop aller tieje. In de beeldvorming die róndj Sinterklaos is óntsjtange zien Germaanse elemente gemingd mèt katholieke. Sinterklaos kèn mèt zien paerd Ozosnel euver dake rieje, krek wie Wodan, de Germaanse oppergod, op zien achbeinig paerd Sleipnir door de wolke kèn vlege. As de Germane in häör hoes saoves en sjnachs same róndj ’t vuur zote of loge, den zoge ze, in häör verbeelding, door ’t breie roukgaat  in ’t daak Wodan as ’t ware in de maonesjien tösse de euverdrievende wolke veurbierieje. Det roukgaat waerde ’n sjouw wao Pieterbaas en zien vrunj doorhaerkroepe óm de cadeaus van Sinterklaos te bezorge. Jaor nao jaor, al generaties lang riejt Sinterklaos op zien paerd, trippel trappel, trippel trap... van daak nao daak! Pieterbaas d’rachteraan, balancerend op de nokpanne mèt ‘ne zak vol cadeaus, sjouw in en sjouw oet! Acrobatiek van formaat? Of se det noe gluifs of neet, idderein is toch blie en tevreje as Sinterklaos weer good haet gereje.