Vare is ós traditionele modertaalwaord det ouch veuroetbewaege op raer (wielen) beteikent. De Germane kalde al van *faran, daomèt waerde iddere vorm van veuroetbewaege bedoeld. Dees basisbeteikenis vinje veur nag truuk in ó.a. ‘bedevaart, zeevaart, luchtvaart, ballonvaart, uitvaart, ruimtevaart, sneltreinvaart, vaartje’. In ’t Middelnederlands waar ’t waord vare ouch gebroekelik, mèt diverse beteikenisse wie ‘gaan, reizen, rijden, varen’. In ’t Nederlands deej zich later ’n sjplitsing veur mèt as resultaat det rijden en varen ’n aparte beteikenis höbbe gekrege. Die sjplitsing is noe ouch definitief in ós modertaal doorgedrónge. In ’t alledaagse modertaaltaalgebroek hure veur vare allein nag mer in de beteikenis van vare mèt vaartuge op ’t water. Vare mèt voortuge, transportmiddele op raer wie de auto, moter, tractor, trein of bös waert has neet mieër gezag, rieje is noe ’t gangbare waord gewaore. Leis in vaarleis is ’n hiel aad waord det al in ’t Indo-Europees (2500 veur Christus) besjting. Leis waar de benaming veur ‘n deep sjpaor, ‘n voor in de gróndj. In ’t Aadhoeëgduits kwaam ’t later veur as ‘waganleisa’ en det beteikent ‘karrenspoor’. In ós modertaal is det ‘n vaarleis. Gleis is ’n vergeliekbare benaming mer den sjpecifiek veur ’n sjpaorlien, de rails.