Traditioneel waerde ’t fieës van Sintermerte op de 11e november gevierd en det veel same mèt de äöpening van ’t vastelaovesseizoen. Die äöpening op de 11e van de 11e greujde oet toet ’n massaal Limburgs fieës en daoróm is ‘t Sintermertesfieës get nao veure of nao achter gesjaove. Mèt ‘ne Paaf! Alaaf! waert de Vastelaovend ingesjaote en ’t vastelaovesvuur as ’t ware aangesjtaok. Nol Wassen haet dao ’n sjoeën leedje euver gemaak, gezónge door Lei Driessen. De titel is ‘As de houp van Sintermerte in de fik sjteit’ mèt ‘n vastelaovesknipuigske nao ’t Sintermertesfieës. Róndj 1900 maakde de Ruiverse jeug éíne groeëte sjanseberm en in Bezel maakde de buurte idder ’ne eige sjanseberm. In de daag veur Sintermerte ware de kinjer al drök bezig mèt sjanse en geld in te zamele. Ze trokke daoveur ónger ’t zinge van ‘Sintermertes veugelke’ mèt ‘n extra baedelcouplet, langs alle huzer. As emes nieks goof zónge de kinjer keihel ’n sjpeciaal couplet euver gietzigheid. Dialectsjriever Jos Bergmans, dae oppe Ruiver opgreujde, haet dao ’n sjoeën dialectverhaol euver gesjreve, truuk te vinje in ‘t jaorbook nr. 6 oet 1986 van Heemkundevereniging Maas- en Swalmdal. De titel is ‘Veur fieërtig jaor ’n Ruivers Sintermertesfieës’, ‘ne truukblik op Jos ziene Ruiverse jeugtied. Haopelik geit de Sintermerteshoup nag jaorelang in de fik en hèlt Sintermerte de Halloweenhekse op aafsjtandj.