“Krieg dich mer gerös ’n pletske oet de pletskestrómmel.” Pletskestrómmels geuf ’t nag bie väöl luuj. Allein kriege ze soms miense op de kóffie die de wäörd kwiet zien. Krieg oet? Pletskes? Pletskestrómmel? ” Hure ze . . . . “keukskes pakke oet de keukskestrómmel” den geit al ’n leechske branje en bie . . . .”koekjes pakke oet de koekjestrómmel” waert ’t pas ech leech. Pletske en plats zien aafgeleid van ’t Latiense waord plattus, det ‘vlak, dun’ beteikent. Veur deile ’t waord pletske oet ós eige wäördtrómmel mèt ós oeësterbure. Dao is ’t waord Plätzchen gangbaar. Pletske en Plätzchen zien aafgeleid van plats en Platz. De plats is ‘ne rónje platte mik, dök gevöld mèt reziene of krinte. Oppe Ruiver goof ’t vreuger platse die sjpeciaal gebakke waerde veur bie de kóffietaofel nao ’n begrafenis. Bekènd is ouch de pletskeskook. In de basis geit ’t daobie óm ‘ne gemingde crème van bótter, sókker, sjterke kóffie én losse in de kóffie gesopde maelpletskes. Den waert de kook laog veur laog opgebouwd, ’n laog pletskes aafgewisseld mèt ’n laog crème. As de kook hoeëg genóg is waere de ziekènj en de bäöveste laog maelpletskes mèt crème aafgesjmaerd. Den waert d’r euveral hagelsjlaag taege gesjtruid. Pletskes zien de meujte van ’t ónthaje waerd. Neet vergaete!

De vraog nao de herkóms van ’t waord pletske kump van Wim Rovers oet Óffebek.