In ónbroek geraakde alledaagse wäörd kriege al gauw, sjtök veur sjtök, ’t etiket ‘vergaete waord’ opgeplek. Beveurbeeld: aerbaes, peers, versjet, telder. Eigelik zien ze gewuuën aafgedank en waere ze supergemekkelik vervange door Nederlandse wäörd: aardbei, perzik, vork, bord. De lies van aafgedankde modertaalwäörd greujt mèt de daag en van ’t biehaje van zó’n lies waers se ech neet blie. Den pas zuus se mèt eige uig wie hel ’t bergaaf geit mèt ós originele waordesjat. Baever is ’n alledaags waord. Vergaete? Gegarandeerd 99% van ós modertaalgemeinsjap zaet ‘bever’. Mer de baever huurt gewuuën thoes in de reeks van normale gangbare wäörd wie de laever (de lever), de kaever (de kever), de gaever (de gever), de waever (de wever), enzoewiejer. En as de aerde baef den is d’r meistal sjpraoke van ’n aerdbaeving. Ouch hie zaet has idderein ‘aardbeving’ en det is gèn Limburgs mer Nederlands. Ós modertaal brokkelt langzaam aaf door taalklimaatverangering.