PUIK DIALECT

Mèt ‘ne fiezendender sjpoeëke verjage

Door: Paul Bloemen

Ein van de vraempste aaj wäörd oet ós modertaal is ‘ne fiezendender. Dit waord kómme v’r taege in ’n aad volksverhaol oet Böstering in Beesel. Gerardus Nijssen waar in 1962 de vertèller: “Mie vader vertèlde ós det vreuger èns in Böstering idderen aovend taegen èlf oer ’n leechske door de sjtruuk op en neer ging. Hóngerde maeters sjómmelde ’t in de duustere op en aaf. De luuj ware sjoew en wóste zich gènne raod.

Mer mie vader waar veur d’n duvel nag neet sjoew en hae is d’r op zekeren aovend, zónger det emes ’t wis, op aafgegange. Hae noom zich ‘ne flinke fiezendender mèt (‘ne flinke dieke knöppel). Hae ging op de loer ligke en dao waerde d’r emes gewaar dae mèt ’n sjtalluch door de sjtruuk leep óm idderein sjoew te make. Vader sjpróng d’rop aaf en sjloog ‘m in eine sjlaag taege de gróndj en ’t sjpoeëk sjtèlde op den daod baejdaag in (vroog óm vergiffenis) en zjwoor noeëts mier te gaon sjpoeëke. Mie vader belaofde ziene naam geheim te haje.”

Klik hier om je gratis in te schrijven voor Puik | Deel deze pagina: