PUIK DIALECT

Kerboet op ’t broeëd mèt kruutje

Door: Paul Bloemen

Kerboet sjteit nag altied op ’t menu. Het is ’n traditioneel gerech oet de Limburgse keuke, vreuger ambachtelik gemaak in de lokale sjlechterie. Taegewaordig is kerboet meistal aafkómstig van de groeëthanjel. In sommige plaatse zègke ze kreboet of kroepoet, in ós dialek zègke veur kerboet. In de Duitse grensregio goof ’t ouch ‘t waord Kerbut of Kruput. In Elmpt en Breyell zagte ze Tüüt. Later waerde Kerbut en Tüt verdrónge door Panhas. In ós provincie is balkebrie (balkenbrij) in opkóms. In Vènlo sjpraeke ze allewiel van balkenbriets. Wao kump ’t waord kerboet of kreboet vanaaf? Nao ’t sjlachte van ‘n vèrke waerde alle nag broekbare sjlachreste, ’t gekluit geneump, in ‘ne groeëte kaetel gedaon en gekaok. Den alles fiengemale en van dae vleisdeig waerde worste gemaak. Die worste ginge weer truuk in de kaokkaetel en waerde nag èns good doorgekaok. Mènnige wors knapde oet häör vel en de inhaad kwaam weer in ’t kaokvóch terech. Det vleis oet de mislökde worste hoot kroepoet, as ’t ware oet de wors gekraope vleis. In die vleisbreuj waerde mael, sjtökskes vet en -typisch Limburgs- verkesblood gedaon. Good reure, druueg laote kaoke en vaerdig waar de kerboet. Nao ’t sjlachte waerde allein ’t gesjlons, de neet broekbare sjlachreste, weggedaon.

Klik hier om je gratis in te schrijven voor Puik | Deel deze pagina: