PUIK DIALECT

Leverkeukskes waere neet gebakke

Door: Paul Bloemen

Kinjer zègke waal èns as se get neet löste: “Ich höb lever get angers of ich wil lever dit of det.” Dök kriege ze den as antjwaord: “Leverkeukskes höbbe veur neet” of “Leverkeukskes waere bie ós neet gebakke.” Keukskes zien ingebörgerd in ós dialek mer waere sjtilaan door koekjes vervange. Alle keukskes ware ieërs pletskes mer die zien noe te min óm te presentere. Pletskes is Limburgse ermood, koekjes is Hollandse riekdóm. Ein pletske haet ’t waal euverlaef en det is ’t maelpletske, in ’t Nederlands theebiscuit geneump. Veur kènne rónje en rechheukige maelpletskes. Hiel bekènd zien de rónje Mariepletskes. Van de rechheukige waert in Limburg nag altied de bekènde pletskeskook, ’n saort taart mèt crèmig aaneingemetselde maelpletskes gemaak. Van te väöl koekjes krieg ós dialek aevel waal ’n gezich wie ’n maelpletske en zuut d’r sjaemel oet.

Klik hier om je gratis in te schrijven voor Puik | Deel deze pagina: