De UNESCO haet in 2000 de 21^efibberwarie euver de ganse waereld as ‘Internationale Dag van de Moedertaal’ oetgerope. De UNESCO vreug daomèt aandach en respect veur alle modertale. Nag altied waere miense individueel en as bevolkingsgroep gediscrimineerd vanwaege häör modertaal, ein cultureel erfgood det de miense van häör veurajers höbbe mètgekrege. Veur moge trots zien op ós lokale modertaal, ’t Bezels-Ruivers, ein echte zèlfsjtenjige taal. Zie is riek van klank en haet ’n sjatkis vol mèt wäörd en oetdrökkinge. Sjpraek ze, laes ze, sjrief ze, loester nao ze. Mèt de Vastelaovend sjteit ze weer bie idderein veur de deur en reup: “Maak de deur èns aop en laot d’r mich èns in.” En ómdet ’t Vastelaovend is wilt idderein de deur waal ’n paar daag aope haje veur ós modertaal, want die sjtraolt leefde en wermte oet, wao idderein mèt Vastelaovend van kèn genete. ’t Kèn neet altied Vastelaovend zien mer de deur altied aope haje en van iddere daag  ‘ne modertaaldaag make det mót toch kènne. Op 21 fibberwarie is ’t zoewied, ós modertaal is den zoegezag jäörig. Hang den de Limburgse vlag oet want det is ós modertaal toch ech waal waerd.