Löbbes is de benaming veur emes mèt ’n good en zaach karakter of veur ’n taam en gewillig bieës. Kielf is van vreuger oet ‘ne Bargoense naam veur ‘ne hóndj. Bargoens waar ‘n biezónjere ‘geheimtaal’, ’n saort sociolect, de dagelikse communicatietaal binnen bepaolde bevolkingsgroepe. Die groepe óntwikkelde en gebroekde ’n eige taal die de res van de bevolking neet kós en dus ouch neet begreep. Toch zien diverse Bargoense wäörd opgenaome in ós algemeine dagelikse taalgebroek. Kielf waert veural in Remunj en Vènlo gebroek. Wuilus is ’n synoniem van löbbes mer den veural van toepassing op persoeëne. “Kinjer, noe sjei toch èns oet mèt det wuilusse!” Wuilusse beteikent in dit verbandj ‘stoeien, ravotten’, det ouch waal kuite geneump waert. Mer mètein kuite haet as risico det ’t kèn ómsjlaon in zich bössele en det is vechte.