Ós modertaal haet diverse oetdrökkinge die neet in ’t Nederlands veurkómme. Ein daovan is ‘te väöl kriege’. “Ich kreeg has te väöl wie ich die kinjer achter de bal aan de sjtraot op zoog renne.” Te väöl kriege waert hie gebroek óm ’n heftige sjrikreactie aan te gaeve. “Ich krieg óngerhandj te väöl van al det drök gewazel.” In dees zin beteikent te väöl kriege det emes get neet mier kèn verdrage, in dit geval drök gewazel. ’n Sjrikreactie waert ouch waal èns besjreve as ’n begaoving kriege. “Ich kreeg has ’n begaoving toen ich dae knal huurde.” Begaoving beteikent ‘een plotselinge heftige aandoening’ wie ‘ne hertaanval, ’n besjlaag, de sjtupe. ’n Angere biezónjere oetdrökking is ‘d’raan kómme’. “Wie ich al det leid zoog kwaam ’t mich richtig d’raan.” Dit beteikent det emes emotioneel erg geraak waert. Vergeliekbaar is de oetdrökking “As se al det leid zuus den kump ’t dich richtig aan die sjaal.”