Biezónjere maelpletskes zien de Mariekeukskes, ouch Mariepletskes geneump. En det kump ómdet de naam ‘MARIA’ op ’t keukske sjteit. Dit keukske woort in 1874 gemaak door bekkerie Peek Frean in Londe ter gelaegenheid van ’t huwelik van prins Alfred, hertog van Edinburgh, mèt groeëthertogin Maria Alexandrovna oet Rusland. ’t Keukske is dus nao groeëthertogin Maria geneump. Prins Alfred waar de zoon van de Britse keuningin Victoria en prins Albert van Saksen-Coburg. Mariepletskes, Maria-biscuits in ’t Ingels, zien in gans Europa populair gewaore en diverse bakproducte van Peek Freans zien euver de ganse waereld bekènd. Typisch zien de gaetjes in de pletskes, die d’rveur zorge det de pletske tiedes ’t bakke plat blieve. In Mesjtreech neume ze ’t Mariepletske ‘peekverjenneke’. Det is ’n prachtig veurbeeld van volksetymologie, de get vervormde naam van Peek Frean gekoppeld aan ’n pletske. Mariepletskes gaon al generaties lang mèt en euverlaefde ouch de sjeiing van Alfred en Maria, neet lang nao de zilvere broelof in 1899